Der CD Express

Vom Jodlerklub Guggershörnli git es e nöi CD u die het üs so guet gfalle, dass mir se bstellt hei. Das isch öppe am Mäntig Abe gsi. Druf si es paar Tag vergange, aber die CD isch nid cho, obwohl mit jede Abe ganz gwungerig i Briefchaschte gluegt hei… So isch es Samschti worde und die CD isch no immer nid itroffe. He nu, hei mir üs gseit, de haut nächscht Wuche. Grad nach em Samschti Mittag han i mi uf e Wäg uf Langnau gmacht, wo plötzlich es Outo vor em Huus aghalte het. Da wott öpper nach em Wäg frage han i mir däicht u ha es paar Schritt uf das Outo zue gmacht. U richtig, d Schibe geit abe u der Fahrer wott öppis frage.

Es isch du aber ganz a e angeri Frag cho aus die won i erwartet hat: «Sit dir der Herr Stocker?« het dä fründlich Bsuecher jetzt gfragt. Mi Tüüri het mi das verblüfft, schliesslich isch das ganz es unbekannts Gsicht gsi. U won i mi im nächste Momänt z erchenne gäh ha, seit dä Unbekannt gheimnisvoll &i hätt euch da nöis…», reckt uf e Rücksitz vom Outo u hebt mir es Couvert entgäge! Ersch itz merke i, wär die Bsuecher si: Herr u Frou E* vom Guggisbärg. U richtig isch i däm Couvert inne die nöi CD wo mir bstellt het. Itz isch d Fröid natürlich gross gsi. Die CD vom Jodlerklub Guggershörnli isch doch no cho, persönlich überreicht vom Presidänt! So öppis han i doch no nie erläbt u möcht o uf däm Wäg no einisch vo Härze Danke säge! Es isch e Überraschig gsi, wo gärn wyter erzellt wird u wo mir lang dra wärde dänke. Grad denn, wenn mi die schöne Lieder wärde lose.

Jodlerklub Guggershörnli: CD «Bis stolz e Jodler z‘ sy»

Was für Lieder het’s uf dere CD? Eis isch ganz es bekannts, nämlich «Das cha nur Liebi si» vom Ueli Zahnd. Der Ueli isch o der musikalisch Leiter vom Jodlerklub Guggershörnli. Zäme mit ihrem Dirigänt singe die Froue u Manne vom Guggisbärg aber no mängi angeri beöiebti Melodie: «E Wunsch» vom Robert Fellmann, «U ame Samschtig z Nacht», es traditionells Jodellied. Oder die bekannti «Bärgandacht» vom Reto Stadelmann. Grad das isch es, was dere CD ganz es speziells Gsicht git: d Uswahl von ganz verschidene Jodellieder, wo aber doch so guet zäme passe, dass es eifach immer wider Fröid macht, zum zuelose. Das isch aber nume z einte. Es git no öppis, wo die CD uszeichnet: es isch der Jodlerklub Guggershörnli. Die Froue u Manne vo däm Bärner Chor singe so, wie me sich das als Jodlerfründ nume cha wünsche: innig u schön! E Chor wo wie mit eire Stimm singt u jutzet u ganz es töifs Gspüri für die schöne Lieder bewist: früsch u voller Chraft, aber o fiin, sinnig u immer ächt! So singt der Jodlerklub Guggershörnli. Mir säge Dank für das Gschänk.

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert